ബോബി ഫിഷര്‍

അമേരിക്കൻ വംശജനായ ചെസ്സ് മാസ്റ്ററായ ബോബി ഫിഷര്‍ കൗമാര പ്രായത്തിൽ‌ തന്നെ ചെസിലെ പ്രാവീണ്യം‌ കൊണ്ട് പ്രശസ്തനായ വ്യക്തിയാണ്. 1943 മാർച്ച് 9 ന് ചിക്കാഗോയിൽ ജനിച്ച അദ്ദേഹത്തിന്റെ യഥാർത്ഥ പേര് റോബർട്ട് ജെയിംസ് ഫിഷർ എന്നാണ്. അദ്ദേഹം പിഞ്ചുകുഞ്ഞായിരിക്കുമ്പോൾ തന്നെ ഫിഷറിന്റെ മാതാപിതാക്കൾ വിവാഹമോചനം നേടിയിരുന്നു. മൂത്ത സഹോദരി ജോവാൻ ഒരു ചെസ്സ് സെറ്റ് വാങ്ങിയതിനുശേഷം ആറാമത്തെ വയസ്സിൽ അദ്ദേഹം ചെസ്സ് പഠിക്കാൻ തുടങ്ങി. യുവാവായിരുന്ന ഫിഷർ ബ്രൂക്ലിൻ ചെസ്സ് ക്ലബ്ബിലും മാൻഹട്ടൻ ചെസ്സ് ക്ലബ്ബിലും വെച്ച് തന്റെ കഴിവുകൾ മെച്ചപ്പെടുത്തി.

14-ാം വയസ്സിൽ യുഎസ് ചെസ്സ് ചാമ്പ്യൻഷിപ്പ് നേടിയ ഏറ്റവും പ്രായം കുറഞ്ഞ കളിക്കാരനായി അദ്ദേഹം റെക്കോർഡ് പുസ്തകങ്ങളിൽ സ്ഥാനം നേടി. 1956-ല്‍ ന്യൂയോര്‍ക്ക് സിറ്റിയില്‍ വച്ച് നടന്ന ടൂര്‍ണമെന്‍റില്‍ ഡൊണാള്‍ഡ് ബൈറനെതിരെ നേടിയ തകര്‍പ്പന്‍ വിജയത്തോടെ അദ്ദേഹം അന്താരാഷ്ട്ര ശ്രദ്ധ നേടി. 17-ാമത്തെ നീക്കത്തിൽ ചെസിലെ റാണിയെ പണയപ്പെടുത്തി ആ ടൂര്‍ണമെന്‍റിൽ ഫിഷര്‍ നടത്തിയ പ്രത്യാക്രമണത്തോടെ ആ കളി "നൂറ്റാണ്ടിലെ കളി" എന്ന വിശേഷണം നേടി. 1958 ൽ, 15 വയസ്സുള്ളപ്പോൾ, യുഗോസ്ലാവിയയിലെ (ഇപ്പോൾ സ്ലൊവേനിയ) പോർട്ടോറോസിൽ നടന്ന ഒരു ടൂർണമെന്റിൽ ആറാം സ്ഥാനത്തെത്തി ചരിത്രത്തിലെ ഏറ്റവും പ്രായം കുറഞ്ഞ അന്താരാഷ്ട്ര ഗ്രാൻഡ്മാസ്റ്ററായി അദ്ദേഹം മാറി.

പതിനാറാമത്തെ വയസ്സിൽ അദ്ദേഹം ഹൈസ്കൂളിൽ നിന്ന് പഠനം അവസാനിപ്പിച്ചു. 1958 ൽ എട്ട് അമേരിക്കൻ ചാമ്പ്യൻഷിപ്പുകളിൽ ആദ്യത്തേത് നേടി. 1964 ലെ ടൂർണമെന്റിൽ 11 കളികളിലും വിജയിച്ച ഒരു അമേരിക്കൻ ചാമ്പ്യൻഷിപ്പിൽ മികച്ച സ്കോർ നേടിയ ഏക കളിക്കാരനായി അദ്ദേഹം മാറി. 1970-71 കാലത്ത് നടന്ന ലോക ചാമ്പ്യൻഷിപ്പ് മത്സരത്തില്‍ ഫിഷര്‍ തുടര്‍ച്ചയായി 20 തവണ വിജയിയായിരുന്നു. സോവിയറ്റ് യൂണിയന്‍റെ മുന്‍ ലോകചാമ്പ്യനായ ടിഗ്രാന്‍ പെട്രോഷ്യനോട് മൂന്ന് തവണ അദ്ദേഹം സമനില നേടി. 1972-ല്‍ ഐസ്‌ലാന്റിലെ റെയ്ജാവക്കില്‍ നടന്ന മത്സരത്തില്‍ സോവിയറ്റ് യൂണിയന്‍റെ ബോറിസ് സ്പാസ്കിയെ പരാജയപ്പെടുത്തിയപ്പോള്‍ ലോക ചാമ്പ്യന്‍ പദവി നേടുന്ന ആദ്യത്തെ അമേരിക്കന്‍ വംശജനായി ഫിഷര്‍ മാറി. ഒരു സോവിയറ്റ് എതിരാളിയെ ഫിഷർ പരാജയപ്പെടുത്തിയത് ശീതയുദ്ധകാലത്ത് ഏറെ ശ്രദ്ധിക്കപ്പെടുകയും കമ്മ്യൂണിസത്തിനെതിരായ ജനാധിപത്യത്തിന്റെ പ്രതീകാത്മക വിജയമായി ആഘോഷിക്കപ്പെടുകയും ചെയ്തു. ഫിഷറിന്റെ ചരിത്രപരമായ വിജയം ചെസ്സിനെ അമേരിക്കയിൽ ഒരു ജനപ്രിയ ഗെയിമാക്കി മാറ്റി.

ആഗോള പ്രശസ്തി ഉണ്ടായിരുന്നിട്ടും, ഫിഷറിന്റെ വിവാദപരമായ പെരുമാറ്റം പ്രധാനവാർത്തകളായി. 1970 കളുടെ മധ്യത്തിൽ, അനറ്റോലി കാർപോവുമായി കളിക്കാൻ അദ്ദേഹം വിസമ്മതിച്ചു, അതിനാൽ ഇന്റർനാഷണൽ ചെസ് ഫെഡറേഷൻ അദ്ദേഹത്തെ ചാമ്പ്യൻഷിപ്പിൽ നിന്ന് പുറത്താക്കി. അപ്രതീക്ഷിതമായ നീക്കങ്ങളിലൂടെ എതിരാളിയെ ഞെട്ടിച്ചുകൊണ്ട് വിജയിയാവുക എന്നതായിരുന്നു ഫിഷറുടെ രീതി. ഫിഷര്‍ കളിച്ച 8 തവണയും അദ്ദേഹം അമേരിക്കന്‍ ചാമ്പ്യന്‍ഷിപ്പ് വിജയിയായിരുന്നു. പിന്നീട് ഐസ്‌ലാന്റ് പൗരത്വം സ്വീകരിച്ച അദ്ദേഹം 2005 ൽ അവിടേക്ക് താമസം മാറ്റി. മൈ 60 മെമ്മറബിള്‍ ഗെയിംസ് എന്ന അദ്ദേഹത്തിന്‍റെ പുസ്തകം 1969-ല്‍ പ്രസിദ്ധീകരിച്ചു. ഈ പുസ്തകത്തെ ചെസ് സാഹിത്യത്തിലെ ക്ലാസിക്കുകളിലൊന്നായി കണക്കാക്കപ്പെടുന്നു.