അൽക്കാട്രാസ് ജയിൽ

കാലിഫോർണിയയിലെ സാൻ ഫ്രാൻസിസ്കോ ബേയിലെ അൽക്കാട്രാസ് ദ്വീപിൽ സ്ഥിതിചെയ്യുന്ന ഫെഡറൽ ജയിലാണ് അൽക്കാട്രാസ് ജയിൽ. 1850 കളുടെ അവസാനം മുതൽ 1933 വരെ യുഎസ് സൈനിക ജയിലിന്റെ സ്ഥിതിചെയ്തിരുന്നതും ഇവിടെയായിരുന്നു. 1934 ലാണ് ഇവിടെ ഫെഡറൽ ജയിൽ ആരംഭിക്കുന്നത്, 1963 വരെയുള്ള ഇതിന്റെ പ്രവർത്തന കാലയളവിൽ, അമേരിക്കയിലെ ഏറ്റവും അപകടകാരികളും നിരീക്ഷിക്കാൻ പ്രയാസമുള്ളവരുമായ ചില കുറ്റവാളികളെ പാർപ്പിച്ചിരുന്ന സ്ഥലമായിരുന്നു ഇത്. പ്രവർത്തനച്ചെലവ് കാരണം ജയിൽ അടച്ചുപൂട്ടിയ ശേഷം,1969 മുതൽ ഒരു കൂട്ടം പ്രാദേശിക-അമേരിക്കൻ ആക്ടിവിസ്റ്റുകൾ ദ്വീപ് കൈവശപ്പെടുത്തി. ഇന്ന്, ചരിത്രപരമായ അൽക്കാട്രാസ് ദ്വീപ് ഒരു വിനോദ സഞ്ചാര കേന്ദ്രമാണ്. ദിവസേന നൂറുകണക്കിന് സന്ദർശകരെ ബോട്ട് മാർഗ്ഗം ദ്വീപിൽ എത്തിക്കുന്നു.

1850 കളുടെ അവസാനത്തോടെ യു‌എസ് സൈന്യം അൽക്കാട്രാസിൽ‌ സൈനിക തടവുകാരെ പാർപ്പിക്കാൻ തുടങ്ങി. സാൻ ഫ്രാൻസിസ്കോ ഉൾക്കടലിന്റെ തണുത്തതും ശക്തമായതുമായ ജലാശയങ്ങളാൽ മെയിൻ ലാന്റിൽ നിന്ന് ഒറ്റപ്പെട്ടുപോയ ഈ ദ്വീപ് ഒരു ജയിലിനുള്ള ഏറ്റവും അനുയോജ്യമായ സ്ഥലമായി കണക്കാക്കപ്പെട്ടു. അതിനാൽ തന്നെ ഒരു അൽക്കാട്രാസ് അന്തേവാസിയും നീന്തൽ വഴി രക്ഷപ്പെടാൻ ശ്രമിക്കില്ലെന്നും ശ്രമിച്ചാലും രക്ഷപ്പെടില്ലെന്നും അനുമാനിക്കപ്പെട്ടു. സൈനിക ജയിലായിരിക്കെ, അമേരിക്കൻ ആഭ്യന്തരയുദ്ധത്തിൽ (1861-65) രാജ്യദ്രോഹക്കുറ്റം ആരോപിക്കപ്പെട്ട കോൺഫെഡറേറ്റ് അനുഭാവികളും പൗരന്മാരും അൽക്കാട്രാസിലെ അന്തേവാസികളായിരുന്നു. സ്പാനിഷ്-അമേരിക്കൻ യുദ്ധ (1898) സമയത്ത് അൽക്കാട്രാസിലെ അന്തേവാസികളുടെ എണ്ണം വർദ്ധിച്ചുകൊണ്ടിരുന്നു. ഇരുപതാം നൂറ്റാണ്ടിന്റെ തുടക്കത്തിൽ, ഇവിടുത്തെ അന്തേവാസികളെ ഉപയോഗിച്ച് അൽക്കാട്രാസിൽ ഒരു പുതിയ സെൽ ഹൗസ്, ആശുപത്രി, മെസ് ഹാൾ, മറ്റ് ജയിൽ കെട്ടിടങ്ങൾ എന്നിവ നിർമ്മിച്ചു.

1933-ൽ സൈന്യം അൽക്കാട്രാസിനെ യു.എസ്. ജസ്റ്റിസ് ഡിപ്പാർട്ട്‌മെന്റിന് വിട്ടുകൊടുത്തു. മറ്റ് യുഎസ് തടവുകാർക്കൊപ്പം കൈകാര്യം ചെയ്യാൻ ബുദ്ധിമുട്ടായിരുന്ന ക്രിമിനലുകളെ പാർപ്പിക്കാൻ കഴിയുന്ന ഒരു ഫെഡറൽ ജയിൽ ആവശ്യമായി വന്നതോടെയായിരുന്നു ഇത്. അൽക്കാട്രാസിലെ നിലവിലുള്ള സമുച്ചയം കൂടുതൽ സുരക്ഷിതമാക്കുന്നതിനുള്ള നിർമ്മാണ പ്രവർത്തനം ആരംഭിക്കുകയും, പരമാവധി സുരക്ഷാ സൗകര്യങ്ങളോടെ 1934 ജൂലൈ 1 ന് ഔദ്യോഗികമായി ആരംഭിക്കുകയും ചെയ്തു. 3 മീറ്റർ മുതൽ 1.5 മീറ്റർ വരെ വലുപ്പമുള്ള വിവിധ സെല്ലുകളിലായി 450 കുറ്റവാളികളെ വരെ പാർപ്പിക്കാൻ അൽക്കാട്രസിന് കഴിയുമെങ്കിലും, ഒരേ സമയത്ത് 250 ലധികം തടവുകാരെ ദ്വീപിൽ പാർപ്പിച്ചിട്ടില്ല. ജയിലിന്റെ പ്രവർത്തന കാലത്ത് 14 ശ്രമങ്ങളിലായി 36 തടവുകാർ ഇവിടെ നിന്നും രക്ഷപ്പെടാൻ ശ്രമിച്ചു. ഇതിൽ 23 പേരെ പിടികൂടി, ആറ് പേരെ വെടിവെച്ച് കൊന്നു, രണ്ട് പേർ മുങ്ങിമരിച്ചു. എന്നാൽ ഇവിടെ നിന്നും രക്ഷപെട്ട മൂന്നുപേരെ ഒരിക്കലും കണ്ടെത്തിയിട്ടില്ല.

1962 ജൂൺ 12 ന്‌, അതിരാവിലെ പതിവ് ബെഡ് ചെക്ക് സമയത്ത് മൂന്ന് കുറ്റവാളികൾ അവരുടെ സെല്ലുകളിൽ ഇല്ല എന്ന് കണ്ടെത്തി. ജോൺ ആംഗ്ലിൻ, സഹോദരൻ ക്ലാരൻസ്, ഫ്രാങ്ക് മോറിസ് എന്നിവരായിരുന്നു ആ പ്രതികൾ. രാത്രി കാവൽക്കാരെ കബളിപ്പിക്കുന്നതിനായി അവരുടെ കിടക്കകളിൽ പ്ലാസ്റ്റർ, ഫ്ലെഷ്-ടോൺ പെയിന്റ്, യഥാർത്ഥ മനുഷ്യ മുടി എന്നിവകൊണ്ട് നിർമ്മിച്ച ഡമ്മി തലകൾ സ്ഥാപിച്ചിരുന്നു. ജയിൽ പൂട്ടിയിട്ട്, തീവ്രമായ തിരച്ചിൽ ആരംഭിച്ചു. എന്നാൽ അവരെ കണ്ടെത്താൻ കഴിഞ്ഞില്ല. ഈ സംഭവത്തെ ആസ്പദമാക്കി ഡോൺ സീഗൽ സംവിധാനം ചെയ്ത, 1979 ൽ പുറത്തിറങ്ങിയ അമേരിക്കൻ ചലച്ചിത്രമാണ് എസ്‌കേപ്പ് ഫ്രം അൽക്കാട്രാസ്. 1963 ൽ ജെ. ക്യാമ്പ്‌ബെൽ ബ്രൂസ് എഴുതിയ ഇതേ പേരിലുള്ള നോൺ-ഫിക്ഷൻ പുസ്തകത്തിനെ അടിസ്ഥാനമാക്കിയുള്ളതാണിത്. അൽക്കാട്രാസ് ദ്വീപിലെ മാക്സിമം സെക്യൂരിറ്റി ജയിലിൽ നിന്ന് തടവുകാർ രക്ഷപ്പെടുന്നതിനെ നാടകീയമായി ഈ ചിത്രത്തിൽ അവതരിപ്പിക്കുന്നു.